English
ពិធីជួបជុំអតីតសិស្សសាលារៀន អន្តរទ្វីប អាមេរិកាំង
ក្រុមអតីតសិស្សនៃសាលារៀន អន្តរទ្វីប អាមេរិកាំង ចាប់ពីឆ្នាំ ២០០៥ ដល់ឆ្នាំ ២០១៥ បានបង្កើតកម្មវិធីជួបជុំយ៉ាងអធិកអធម និងស្នើឱ្យមានកម្មវិធីជួបជុំ ក្រោយបែបគ្នាអស់ជាច្រើនឆ្នាំ។ កម្មវិធីជួបជុំនេះ បានប្រព្រឹត្តទៅកាលពីរាត្រីថ្ងៃទី២៦ ខែមីនា ឆ្នាំ២០២២ នៅ Mekong View II ក្រោមអធិបតីភាពអ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃសាលារៀន អន្តរទ្វីប អាមេរិកាំង ចាងហ្វាង លោកគ្រូ អ្នកគ្រូ ជាច្រើនរយនាក់។
បើតាមលោក លឹម ប៊ុនឡុង អតីតសិស្សបានបញ្ចប់ថ្នាក់ទី១២ កាលពីឆ្នាំ២០០៩ និងជាអ្នកបានរួមចំណែករៀបចំកម្មវិធីនេះបានឱ្យដឹងថា កម្មវិធីជួបជុំមិត្តចាស់ដ៏កម្រនេះ ធ្វើឡើងដើម្បីបង្កើននូវមិត្តភាព សាមគ្គីភាព រំលឹកអនុស្សាវរីយ៍ល្អៗ និងជាការចងចាំទាំងឡាយកាលពីនៅសិក្សាជាមួយគ្នា រវាងមិត្តភក្តិចាស់ៗដែលបានបែកគ្នាអស់រយៈពេលជាង១០ឆ្នាំ និងធ្វើបច្ចុប្បន្នភាពនៃការវិវត្ត ការផ្លាស់ប្តូរខ្លួនបន្ទាប់ពីបញ្ចប់ការសិក្សារយៈពេលកន្លងមក។ ជាពិសេសផ្លាស់ប្តូរបទពិសោធ ចែករំលែកនូវអ្វីដែលថ្មីដល់គ្នាទៅវិញទៅមក។
អតីតសិស្សសាលារៀន អន្តរទ្វីប អាមេរិកាំង កំលុងឆ្នាំ២០១០ អ្នកនាង នឹង មុយលី បាននិយាយថា «កម្មវិធីនេះពិតជាល្អមែនទែនសម្រាប់ខ្ញុំ និងមិត្តភក្តិដទៃទៀត ដែលមានឱកាសបានជួបជុំមិត្តភក្តិចាស់បន្ទាប់ពីបែកគ្នាអស់រយៈពេលជាច្រើនឆ្នាំ។ សង្ឃឹមថាឆ្នាំក្រោយៗធ្វើបានកាន់តេធំទៅៗ ហើយបើឱកាសក្រោយ ឬឆ្នាំក្រោយៗមានកម្មវិធីហ្នឹងទៀតខ្ញុំនឹងចូលរួមទៀត។»
ជាមួយគ្នានេះ ប្រធានសាលារៀន អន្តរទ្វីប អាមេរិកាំង លោកស្រី រស់ យ៉ាណា បានថ្លែងចំណាប់អារម្មណ៍យ៉ាងដូច្នេះ «ខ្ញុំពិតជាមានក្តីសោមនស្សរីករាយ និងរំភើបក្រៃលែងដែលបានចូលរួមក្នុងកម្មវិធីជួបជុំដ៏កម្រ និងប្រកបដោយអត្ថន័យមួយនេះ។ កម្មវិធីនេះអាចនិយាយបានថា ជាកម្មវិធីលើកទី២ ដែលអាចនិយាយបានថាជាព្រឹត្តិការណ៍ដ៏មានសារៈសំខាន់បំផុត ដែលមានការចូលរួមយ៉ាងច្រើនពីសំណាក់ លោកគ្រូ អ្នកគ្រូ និងអតីតសិស្ស»។
លោកស្រី បន្ថែមថា នេះជាការឆ្លុះបញ្ចាំងមួយដែលមិនអាចកាត់ថ្លៃបានចំពោះអតីតសិស្សនៃសាលារៀន អន្តរទ្វីប អាមេរិកាំង ដែលបានសម្រេចនូវភាពអស្ចារ្យ ដែលក្លាយជាសសរទ្រូងសម្រាប់គ្រួសារ សង្គម ប្រទេសជាតិ និងមានជីវិតគ្រួសារមួយដ៏ពេញលេញ មានមុខរបរមួយច្បាស់លាស់បន្ទាប់ពីបញ្ចប់ការសិក្សារយៈពេលយូរឆ្នាំកន្លងមក។ លោកស្រីក៏បានកោតសរសើរ ស្ញប់ស្ញែង និងបន្តលើកទឹកឱ្យមានព្រឹត្តិការណ៍ដ៏មានសារៈសំខាន់នេះ កើតមានជាបន្តបន្ទាប់នៅរៀងរាល់ប្រាំឆ្នាំម្តង ឬបើអាចត្រឹមបីឆ្នាំម្តង។
ក្នុងឱកាសនេះផងដែរ អ្នកឧកញ៉ា វេជ្ជបណ្ឌិត គួច ម៉េងលី បានថ្លែងអំណរគុណដល់សិស្សានុសិស្ស និងបានកោតសរសើរដល់ភាពរីកចម្រើនពីមួយជំនាន់ទៅមួយជំនាន់របស់សិស្សានុសិស្សទាំងអស់ បន្ទាប់ពីបានបញ្ចប់ការសិក្សានៃសាលារៀន អន្តរទ្វីប អាមេរិកាំង ដែលជាសមិទ្ធផលមួយដ៏ធំធេងដែលលោក មិននឹកស្មានដល់រហូតមានការទទួលស្គាល់ជាសកល។
ការជួបជុំអតីតសិស្សនេះ ក៏មានការរៀបចំពិធីជូនវត្ថុអនុស្សាវរីយ៍ ក៏ដូចជាការដឹងគុណដល់លោកគ្រូ អ្នកគ្រូ ដែលជាអាណាព្យាបាលទីពីរ និងជាអ្នកធ្លាប់បង្ហាត់បង្រៀនកាលពីកន្លងផងដែរ។
សូមជម្រាបថា សាលារៀន អន្តរទ្វីប អាមេរិកាំង ត្រួវបានបង្កើតឡើងក្នុងឆ្នាំ២០០៥ ដោយអ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុនម៉េងលី ជេ. គួច អេឌ្យូខេសិន។ បច្ចុប្បន្នគ្រឹះស្ថានសិក្សារបស់អ្នកឧកញ៉ា វេជ្ជបណ្ឌិត គួច ម៉េងលី បាននិងកំពុងពង្រីកសក្ដានុពលរបស់ខ្លួនឆ្ពោះទៅតាមបណ្ដាខេត្តរាជធានីនៅទូទាំងប្រទេស៕